中環出更：IT豪帶隊睇3D世盃
南非世界盃進入十六強淘汰賽，戰情愈趨激烈，有機會到南非睇現場賽事當然最好啦，但去唔到唔緊要，事關數碼港同嘉禾已經成功推出3D直播賽事。繼早前嘉禾院線喺尖沙咀海運戲院試播阿根廷對南韓賽事後，有份研發嘅數碼港都唔輸蝕，前晚邀請咗資訊科技界議員譚偉豪等多名立法會議員及IT業界人士，齊齊去數碼港欣賞荷蘭對斯洛伐克十六強賽事，個個戴住副3D眼鏡睇到嘩嘩聲！
前晚有兩大隊人操去數碼港湊熱鬧，以IT豪為首嘅議員隊有李華明、黃成智及張國柱，IT業界精英就有遠東發展創辦人邱德根個細仔、遠東控股董事總經理邱達根（Duncan）及菁英會副主席洪為民等人，數碼港管理有限公司行政總裁林向陽做導遊負責接待。一行人九點半鐘先到控制室參觀3D影像嘅加工製作過程，晚上十時再移師到數碼播映培訓室體驗3D世界盃直播賽事。
肥仔明近視感辛苦
入場後，大家戴上一副特製嘅3D眼鏡，一邊飲啤酒同汽水，一邊睇波，全程睇得相當興奮，每逢入球緊張時刻都振臂歡呼起來，氣氛唔差得過喺酒吧睇波。大家睇咗一段時間後都覺得直播好流暢，唯獨肥仔明就話啲3D眼鏡技術仍有待改進，事關對於佢呢啲有深近視嘅人來說，每次替換眼鏡都比較辛苦，要一段時間適應。
同場嘅Duncan都係足球發燒友，佢話細細個已經好鍾意踢波，而且仲係中堅分子添，但今次並非純粹睇波咁簡單，而係希望睇吓3D方面有乜可以投資。講咗咁耐，3D球賽有幾好睇呢？IT豪話，3D球賽係利用3D攝影技術，影像好有層次感，睇落會更加清晰和逼真。不過，欣賞每場球賽要付出三百元，拍得住普通演唱會門券價錢。
卓妮