埃及車禍孤兒立志投身義工

努力讀書　愛人愛己

○六年二月，本港十六個家庭歡歡喜喜到埃及旅遊，竟踏上死亡之旅，其中曉晴一家只有她檢回性命，這宗慘劇令不少香港巿民哀痛。十四歲在意外中變成孤兒的曉晴，經歷人生最無助、最失落的時刻，精神接近崩潰，心靈創傷難以消退。不知有多少個晝夜親友輪流陪伴她，事後她與姑母一家同住，「當時我有諗過放棄自己，但每次好快打消念頭，因為身邊人給予我好多愛，令我知道自我放棄實在太自私，我知道自己有能力去走呢條路」。

曉晴亦難忘同學的一份情，在康復回校上課後，主動教她做功課、陪伴她搭車。深受身邊人無私的關愛所感動，曉晴再「站起來」，決心努力讀書，○八年會考取得二十二分，「只要堅持信念，無嘢係做唔到嘅」。

表達愛意 不想遺憾

現年十八歲的曉晴，接受訪問的時候表示，「爸爸媽媽離開我，當時我嘅年紀仲好細，後來好後悔以前無向父母表達對佢哋嘅愛意，環境迫使我獨立，明白好多嘢唔係必然，我依家會盡力向親人表達愛意，唔想日後再失去至親時才遺憾一生」。

不過，曉晴至今溫習時，仍會偶爾憶起意外的零碎片段，「有時都掛住爸爸媽媽，佢哋活喺我心入面，我會盡力記住啲開心片段」。已失去太多的曉晴，卻總覺得自己擁有的較他人多，「做人應着眼於自己擁有嘅一切，會發現好多嘢係你有，人哋無嘅」，因此，她中六時已參加聯合國兒童基金會青年計劃，幫助世界各地有需要的兒童。「自己一個會有無助嘅感覺，尤其是脆弱和反抗能力較低嘅小朋友，我好希望可以幫到佢哋」，她今年十二月將到內地參與兒童扶貧工作。