懶除雜草食署養蚊為患

元朗雷公田村鄉公所旁有小溪，溪旁高逾三米的雜草早成蚊患重災區，「我屋企成間屋裝晒蚊紗都冇用，個仔都係中晒招！」雷公田村村民李先生指四歲兒子的眼瞼、耳背、手腳均為蚊子攻擊目標，被叮至嚴重紅腫，「畀蚊叮可大可小，搞到有登革熱或日本腦炎點算？邊個負責？」

家中一人一蚊拍

另一村居民盧太亦指每屆傍晚五至六時，便須出動電蚊拍，「多蚊到好得人驚！睇緊電視都要拎住電蚊拍在手腳周圍掃。」盧太坦言因蚊患嚴重，家中所有成員早已購備「一人一蚊拍」，以求自保。

鑑於蚊患已持續多年，李先生曾多次向村長反映，一直處事被動的食環署只會在接獲村長要求後始行動，惟剪草工人又「剪啲唔剪啲」，小溪旁大堆雜草至今仍原封未動。

蚊患肆虐元朗區，天水圍亦同被蚊子攻陷，居於天富苑的張太便說：「街坊話住喺三十樓都有蚊，我喺七樓更加要每晚起身打蚊，冇理由因為咁就要長開冷氣啫！」張太促當局加強滅蚊，保障市民健康。

食環署資料顯示，五月的誘蚊產卵器平均指數達百分之九點五，其中元朗元崗指數錄得全港最高，達百分之三十二，已超越百分之二十的警戒水平。傳染病專科醫生勞永樂表示，流動而不急的水流最適合傳播日本腦炎的庫蚊孳長，大量產卵繁殖，故河道岸邊的雜草應定期修剪，加快水流速度。

雷公田村內不少河道水流極慢，成為蚊子孳長溫床。

盧太示範每晚揮着電蚊拍收看電視節目情形。

團體斥監管不力

「擺明就係食環署監察不力，有滅蚊隊都做唔到嘢！」香港捉蚊協會發言人石國強表示，隨着雨季來臨，已陸續收到約七十宗市民求助滅蚊的個案，其中七成來自元朗區，「試過有食環署工人反映，話好多時都唔夠蚊水噴，唔排除有人想慳成本，蚊患可能就係咁形成！」

食環署發言人指出，元朗區防治蟲鼠組人員實地考察完後，已安排承辦商在雷公田村噴灑滅蚊水，並將剪草事宜轉介元朗民政事務處處理。至於天富苑方面，發言人表示已提醒屋苑管理人員須定期執行控蚊工作。

不過，李先生透露，村內鄉公所對開位置直至六月中仍雜草叢生，他說：「要投訴完先做嘢，唔通公務員淨係識坐喺辦公室歎冷氣？」

■記者 張美蘭