政情：葉劉林D9美食「勞軍」
立法會一連兩日激辯政改方案，仍未表決立法會選舉決議案，已經拗咗足足二十粒鐘，議員打咗一場持久戰，採訪記者同工作人員一樣打咗一場耐力賽，飯都未必準時有得食，難得匯賢智庫主席葉劉淑儀及官員好識做，將一盆盆美食分批送入立法會。
尋日下晝五點幾，正當議員為發言臉紅耳熱之際，葉劉同助手捧住八大盆壽司及冷熱盤走入立法會，原來係迴轉壽司外賣。葉劉話，知大家辛苦咗兩日，請大家食壽司。一個鐘之後，又到政制及內地事務局局長林D9林瑞麟搵助手送咗幾大袋燒味入嚟，跟住又有高官送上官邸秘製嘅紅棗糕及馬蹄糕。
葉劉請食嘢唔係新鮮事，但林D9又做乜咁好請食燒味呢？原來林D9知悉葉劉請大家食嘢，主動請埋一份，一小時後將幾大袋燒味送到，反應都算快咯。