政情：李永達轟邱副放飛機
立法會傾政改，支持者同反對派喺門外紮晒馬，本來已經夠熱鬧，點知仲多埋幾十個菜園村村民，佢哋唔係為政改而來，而係為起屋。原來佢哋一早約好咗運輸及房屋局副局長邱誠武喺灣仔修頓中心開會，又請埋立法會議員李永達出席，嚟個三方會議。
點知李永達話要開立法會，提議不如改喺立法會開，於是班村民喺三點幾殺到立法會，坐晒喺地下度等了又等，但等咗好耐都未見邱副局。佢哋好鬼㷫，高叫口號「重建家園，還我新菜園村！」、「局方食言」等等，唔知仲以為立法會又傾高鐵撥款。
李永達話聯絡咗邱副局好多次，仲話邱副局要為今次放飛機事件負全責：「咁嘅副局長點做大事？連開會地點都要扮大牌！」運輸及房屋局發言人就話，一早同村民約好喺修頓開會，朝早重確認多次，村民都話無問題，點知等到四點幾都唔見人，打畀佢哋，佢哋話喺立法會，叫邱副局過去，但邱副局行唔開，未能赴會。卒之搞到八點幾，村民先返去修頓同邱副局開會，都唔知信邊個好！