政情：阿涂爆范太選特首？
過去幾年政壇每隔一段時間，就會傳出全國人大常委范徐麗泰有意選特首嘅消息，范太亦多次公開表明絕無其事，但立法會尋日表決政改方案，民主黨涂謹申發言時突然「爆料」，話前日喺立法會餐廳同一位資深建制派議員同枱食飯，聽到話「范太埋緊班」，準備一旦有人腳痛落台，可以接管特區政府。消息夠晒震撼……如果係真的話；不過親建制人士人人話，消息九成流料，莫非范太又畀人擺上枱？
傳言轉移政改焦點
阿涂言之鑿鑿，話中央要解決香港管治危機，如果要搵個信得過嘅人做特首「臨時工」，為港人熟悉嘅范太成為人選唔出奇。佢仲話，尋日咁啱喺立法會廁所撞到一位司局級高官，高官亦話呢個消息「北京傳得好行」喎！
政界近日傳出煲呔曾不惜辭職要中央接納民主黨區議會方案，政壇呢個時候「吹北風」，唔通中央有兩手準備，搵定范太做替工？抑或有人刻意放風，警告煲呔曾唔好有恃無恐？有建制派人士就話，兩樣都唔似，政改方案都過咗啦，中央糾纏落去有乜益？反而，有人製造「驚人」新聞，想盡快轉移社會對政改爭拗嘅焦點，聽落更加似。
工聯會黃國健講得更白，話范太若要跑馬仔，依家應該拉緊票，但從未有聽聞。
范太身邊嘅人話，范太已經回應過，唔再回應囉。咁又係，如果范太次次都回應，真係好唔得閒！