政情：黨友撐英軍 丟低鐵頭仁
英格蘭前晚喺世界盃贏一比○，驚濤駭浪之下終於出線十六強，相信令唔少英格蘭粉絲嚇到標晒冷汗。相比世界盃，香港政改決戰同樣驚心動魄，以白鴿黨為例，由於政府接受佢哋嘅方案，搞到佢哋由反對派變咗「疑似建制派」，黨主席鐵頭仁何俊仁更受千夫所指，去到邊畀人鬧到邊。
驚險嘅場面同樣出現喺前晚白鴿黨離開立法會大樓之時，鐵頭仁喺張文光同甘乃威兩個黨友保護下由正門離開立法會，眾人除咗畀示威者大喝倒采之外，仲有人向佢哋掟雜物同潑水添。白鴿黨近日變成眾矢之的，斷估唔會唔知由正門行出去有可能出事，點解最後得番兩個黨友喺身邊保護主席呢？原來又係三個字：「英格蘭！」
英格蘭捧盃 鄭家富唔退黨？！
話說白鴿黨八個議員原來打算休會後去門口同反對政改嘅示威者對話，點知反政改主辦單位認為既然白鴿黨都決定支持方案，大家理念唔相同，所以請白鴿黨食個大檸檬，話唔使對話喇！幾個白鴿黨議員見唔使面對群眾，即刻急急腳走人去睇波，李華明一馬當先，提早十幾分鐘閃人搭港鐵返歸，最後都只係睇少咗十五分鐘咋。李永達同黃成智又點先？佢哋兩個都一樣，都係去咗灣仔酒吧睇波；唔同嘅係，高達係一個人去，黃成智就係約咗個仔。至於副主席劉慧卿雖然唔係睇波，不過完會後由後門同建制派議員一齊坐立法會專車離開。
白鴿黨成班男人鍾意睇波就係人都知，但勢估唔到佢哋竟然為睇波丟低一齊作戰廿幾年嘅黨友，除咗張文同甘威兩個捱義氣，保護鐵頭仁嘅竟然係狂炳白鴿黨嘅社民連黃毓民，仁哥心情幾咁複雜可想而知。講開英格蘭粉絲，前日宣布退出白鴿黨嘅鄭家富同樣係英軍球迷，佢尋日同前黨友張文開盤，話如果英格蘭贏世界盃冠軍嘅話就唔退黨，仲話呢幾日最開心就係英格蘭晉級添！
白鴿黨呢班標準球迷，為咗睇愛隊比賽竟然連黨主席安危同退黨兩件大事都可以拋諸腦後，唔通香港政壇真係義氣當兒戲？