中環耳目：超雲飲低脂奶美白
夏天陽光猛烈，係肌膚最大敵人。想美白，除咗搽防曬膏，不如學吓賭王千金何超雲，飲多幾包牛奶滋潤皮膚。上星期二傍晚六點，超雲又出動行中環ifc。呢日佢唔再着熱褲，改穿性感小背心、窩釘牛仔褲，配埋啡色蛇皮手袋，貫徹「潮女」打扮。
行超市掃零食
平日行慣名店嘅佢，呢日轉口味，同女性友人改行超市City Super。原來何家淑女「零食癮」發作，睇見薯片、飲品就心花怒放，話咁快掃滿一車嘢。買到咁上下，友人先行去收銀處排定隊，超雲再兜多幾個圈，諗諗吓，原來漏咗買牛奶！於是快步行去售賣奶類飲品嘅凍櫃前，攞起一包高鈣低脂奶及一包脫脂紙包牛奶，再行去會合友人畀錢。
超雲揀奶咁小心，似乎唔想身體吸收太多脂肪，果然係貪靚之人。超雲一身肌膚勝雪，唔知係咪飲奶有功呢？離開超市時，友人錫住超雲，主動幫佢抽住袋嘢，等超雲冇晒牽掛行街街。