中環出更：楊立門戴錶時光倒流？
有AO（政務官）歌王之稱嘅民政事務局常秘楊立門，外表斯文靚仔外，戴錶亦相當踏實。早前喺一個地區活動上，見楊立門戴住一隻價值逾二萬元嘅Omega Seamaster潛水精鋼腕錶，含蓄得嚟不失體面。卓妮大讚楊立門隻錶靚，佢就笑笑口話：「靚乜吖，cheap嘢嚟啫，邊有錢買靚錶吖！」講到隻錶幾時買、買咗幾錢，佢話太耐忘記咗嘞！
Omega Seamaster潛水精鋼腕錶，擁有圓弧形防反光、抗磨損藍寶石水晶鏡面，三百米深防水及有日曆顯示。不過，卓妮發現楊立門隻錶個日子早咗一日，時間就話校慢少少啫，日子都要校早一日？睇怕只係遇啱無三十一日嘅月份，忘記調校日期啫！
