中環出更：胡曉明三日環遊「世界」
上海世博開鑼將近兩個月，仍有不少團體蜂擁北上湊熱鬧。菱電發展有限公司主席、上任不久嘅香港專業及資深行政人員協會會長胡曉明（Herman），早前率領逾百會員暢遊世博三日。世博集合各國展館，花多眼亂，Herman卻兩句話就概括晒。佢話：「一小時可以行晒大江南北，三日就可以環遊世界。」總之眼界大開喇！
Herman本身都係半個世界通，遊歷經驗豐富，如果要問佢去過邊啲國家，不如乾脆問佢仲有咩國家未去過，但參觀世博後，又有一番新感覺。自己係上海人、又係現任上海市政協常委嘅Herman，本身係工程師，連佢都驚嘆中國館設計認真新穎。佢話中華民族百花齊放，各省市都有各自嘅展覽，將風土人情盡展眼前，構成一幅神州縮影，一小時極速遊遍大江南北，令佢嘆為觀止。
世博展品 各國騷Quali
一行人之後兩日再參觀美洲、歐洲、非洲、大洋洲及亞洲展館，短短三天行程就可以環遊世界。世界之大，無奇不有，Herman驚訝各國都「攞真嘢出嚟」示人，好似新西蘭將當地特產植物移植到會場；丹麥亦展出真實嘅美人魚；法國更誇張，出動七架專機運載七幅名畫到上海世博參展。喺世博更可品嘗中、日、法、俄及土耳其等地道菜式，各國佳餚，應有盡有。當大家湧去各大國展館參觀時，佢寧願選擇去人流較少嘅新西蘭展館，睇當地稀有嘅植物。
講番「專資會」發展，Herman上任後搞作多多，過去三個月除完成三份有關廢棄電子、活化工廈及最低工資研究報告外，更透過舉辦富趣味性活動，凝聚唔同界別專業人士。Herman同卓妮講，好似早前開辦「教你如何在數秒內辨識商業對手性格」嘅講座，就吸引咗好多會員出席。所以話，要加強凝聚力，方法好多，最緊要係有心做事！
卓妮