民主黨何俊仁：社民連好強烈話要開除民主黨喺民主派嘅會籍，話要永遠分手，我有四個字回應：順其自然。
民主黨黃成智：從陰謀論去睇，我可以作到十個、八個理由出嚟，話社民連係中方派入嚟嘅代表，派入嚟攪亂民主派的團結。
民主黨涂謹申：我覺得呢個方案不能接受，我係同民主黨有策略嚴重嘅判斷不同，我選擇留低，但仍然會同其他泛民主派，包括社民連同公民黨一齊爭民主。
社民連黃毓民：一個七十九歲嘅老人（司徒華），加埋民主黨六人政制小組，同共產黨進行暗室政治，出賣選民，社民連被迫要同披着民主派畫皮嘅政客分手！
社民連梁國雄：一句憤慨之言唔會令一個人病重。華叔都鬧劉千石係猶大，呢個係對基督徒最狠嘅詛咒，我都唔認為佢要道歉。
職工盟李卓人：民主派散咗，本身抗爭力喺度，但條氣洩咗、翻身難咗；聽到毓民嘅分手宣言，我覺得好可悲。
民建聯陳鑑林：泰國紅衫軍集會之前，我哋對佢哋有乜睇法；我哋若果都採取過激行為，國際社會會用乜目光看待香港？
工聯會王國興：我哋每日都要刷牙，要擠牙膏，唔係一次過將啲牙膏擠晒出嚟先叫民主㗎嘛。成口都係牙膏，點刷牙呀？
自由黨劉健儀：如果係自由黨將一人兩票方案交畀政府，佢一定請我哋食檸檬！有事鍾無艷，無事夏迎春，希望政府畀多啲耐性支持政府施政嘅人士，聽吓同接納佢哋嘅意見。