政情：議員往返立會各出奇謀
二○一二政改方案決戰尋日正式展開，為咗確保各位議員唔會畀示威活動搞到返唔到去開會，立法會秘書處安排接駁巴士由上午九時至十一時半喺金鐘接載議員去立法會，秘書處雖安排周到，但係議員就唔多領情，成個朝早都只有五名議員坐車，包括民主黨涂謹申同甘乃威、民建聯陳克勤同陳鑑林，以及衞生服務界李國麟，因為佢五個都喺唔同時間搭車，最終五次都出現「包車」情況。
葉偉明遭粗口問候
大部分議員都冇用秘書處提供嘅專車服務。工程界何鍾泰朝早八點已經到立法會，佢笑住話咁早到連啲「八十後」示威者都未起身，所以好安全。民記李慧琼就話，佢喺金鐘站落車行去立法會，途經遮打花園，期間仲遇到撐政改支持者，所以不失係一條好嘅路線。工聯會葉偉明由中環站行去立法會，經過遮打花園畀人用粗口問候，最終有驚無險。民主黨李華明尋日都係搭港鐵，到場時冇受滋擾，不過佢就好耐冇試過返工時間搭港鐵，估唔到真係咁逼喎。
會議十點幾休會，議員喺警察護送下，有部分搭港鐵離去。
