政情：起錨啦啦隊 除襟章
煲呔曾發動「政改起錨」騷，最終劣評如潮，拋錨收場，終於捱到立法會辯論表決二○一二年政改方案，曾班子高官團隊尋日落立法會晒馬，人人戴住「起錨」襟章列陣對決，點知嚟做「啦啦隊」嘅一班行政會議成員、副局長同政治助理，入到公眾席時，被立法會保安以不准展示政治標語為由，要求全部除下襟章，曾班子「起錨」行動再次拋錨，失敗告終。
立法會中午過後辯論政改方案之前一小時，曾班子問責團隊官員喺政府總部起錨，搭專車殺落立法會，佢哋人人心口戴住「起錨」襟章，為硬銷方案拚盡至最後一分一秒，可惜眼高手低，有頭威無尾陣。
副局政助 各有各「忙」
以「唐唐」唐英年為首嘅一班司局長，以至一度代政制及內地事務局局長林瑞麟上陣嘅副局長黃靜文，魚貫進入議事堂，紅藍「起錨」襟章入座列陣，但係坐上公眾席嘅一班行會成員、副局長同政助就無法再「起錨」落去，事關立法會政治中立，公眾席上一律禁止展示政治標語，「起錨」絕對係支持政改嘅口號，所以全部人都要除下襟章，連行會召集人梁振英（ＣＹ）都無一例外。其中行會成員夏佳理戴住「起錨」襟章直入公眾席，更加好似煲呔曾落區咁遭遇「突襲」，唔係被社民連「八十後」圍堵，而係被立法會保安「制止」，要佢除咗個襟章先至畀繼續聽會。
立法會秘書處對政治中立呢條底線守得好緊，從今次事件可見一斑，煲呔曾團隊千算萬算，算漏呢一點，結果半支「起錨」船隊觸礁擱淺，連最後一次造勢行動都拋錨收場，睇嚟煲呔曾嘅「起錨」騷注定失敗！
曾班子齊齊戴「起錨」襟章撐政改，係政治表態，但佢哋心裏面有幾着緊方案能否通過，可能只有佢肚裏面條蟲先至知。有人見到，財政司司長政助葉根銓喺公眾席全程攞住個文件夾嚟睇，睇真啲，文件夾係內有乾坤，夾住一本書，至於書嘅內容就不得而知嘞。而食物及環境衞生局政助陳智遠就忙於玩手機，副局長梁卓偉不停㩒電腦，仲有人瞌眼瞓添，總之各有各忙。呢個就係「起錨」船隊嘅隊形嘞！