中環耳目：莫宜端「潛水手」打的奏效
勞工及福利局政治助理莫宜端（Zandra）前日傍晚六點喺中環畢打街過海的士站等過海的士，卓妮見佢頭岳岳遠望皇后大道中轉彎出嚟嘅的士，一見有車就使出「潛水手」截的士。
乜嘢叫做「潛水手」呢？Zandra示範畀大家睇，就係截車時舉高右手並伸直手掌，以波浪式向前推進，即係代表潛水過海咁解，過海的士司機一睇就明，無耐一輛冚旗的士駛至，佢就急急上車離開。Zandra尋日同卓妮講，前日咁啱屋企有急事，所以要飛的過海，佢話咁樣截車會容易啲被的士司機睇到佢，有啲的士係認得呢啲截車手勢嘅！
Zandra尋晚都要駐守立法會等政改表決，佢話忙完政改之後仲未有得抖，事關七月前又要忙最低工資立法，加上要照顧屋企小朋友，廿四小時實在不敷應用，必要時瞓少啲都在所不計。不過政助每月十幾萬人工，辛苦啲都抵番嘅。
