中環出更：鄭明明愛綠寶石升值力強
綠寶石產量稀少，價值遠比紅寶石及藍寶石高。唔少皇室貴族，都鍾情綠寶石。「美容教主」鄭明明也愛上呢份青翠碧綠光芒，寧將私己錢押注喺綠寶石身上。理由好簡單，明明姐話，名錶如何升值，都唔及珠寶升得勁。
閃爍寶石，令人難以抗拒，情不自禁愈買愈多。明明姐家中珍藏嘅珠寶首飾，媲美一間珠寶店，早前以董事身份出席友好協進會周年晚宴，佢戴上價值數百萬元綠寶石項鏈、耳環及戒指，雍容華貴。
鑽勞見證事業有成
呢套首飾係年前細女陳維黛結婚時買嘅，項鏈以一粒淚滴形綠寶石為主石，色澤豐厚明亮。明明姐話整條項鏈一共用上幾多卡鑽石就唔記得清楚嘞，總之條鏈獨一無二，因為款式由佢親自設計，再交由相熟珠寶店為佢鑲嵌。
卓妮留意到，明明姐右手戴上閃爍生輝鑽石錶，原來隻錶有段古，係廿幾年前去新加坡傾生意時買嘅，隻錶係勞力士（Rolex）出品，明明姐一見鍾情，唔使多諗就豪拋數十萬元買來心頭好。隻鑽勞如今升晒值嘞，但明明姐覺得隻錶見證佢事業有成，戴開有感情，幾貴都唔賣喎。
咪睇明明姐呢排明艷照人，查實大半年前佢突然患上濕疹，手腳長出紅疹，遍尋中外名醫，濕疹仍然頑劣，搞到佢心情低落，幸好遇上一位香港名醫，治療三個月後皮膚至白滑番。上月初，明明姐同老公陳樹德邁進結婚四十周年，喺上海百樂門舞廳舉行紅寶石婚宴，筵開一百四十圍，高朋滿座，內地影后劉曉慶都到賀。
卓妮