中環出更：范駿華潮戴Evisu粗框鏡
女士們返工扮靚騷品味，大可喺時裝、手袋或首飾入手，男士除咗一套老西，仲可以點樣表達出自己嘅個人風格呢？日前卓妮就喺一個場合上，撞到全國人大常委范徐麗泰嘅兒子范駿華（Andrew），Andrew西裝骨骨，配以日本潮牌Evisu嘅粗框眼鏡，斯文中帶點潮味。
Evisu由日本著名時裝達人山根英彥（Hidehiko Yamane）創立，以牛仔褲起家，其中佢哋獨有喺後褲袋嘅白色海鷗形標誌，仲成為佢哋嘅生招牌，而Andrew所戴嘅Evisu眼鏡，框柄位置就有呢個海鷗形標誌嘞。Evisu牛仔褲堅持以人手製作，每款產量極少，短短數年間已經喺潮流界打響名堂，就連著名球星碧咸都多次着住Evisu牛仔褲喺公開場合亮相，不愧被稱為日本國寶。
Andrew本身係會計師，着牛記返工唔太啱身份，不過戴番副Evisu眼鏡反而襯晒，認真高招。