政改決戰日近，煲呔曾同公民黨黨魁余若薇尋晚領銜主演辯論大騷，反應點？人人心裏有把秤喇。喺溫和民主派人眼中，今次只不過係一場掩眼騷，有個普選聯核心人士形容：「就好似大人傾緊正經嘢，但細路仔就呱呱嘈，掟部Game-boy畀佢哋玩，等佢哋咪嘈！」
點解溫和民主派人士咁講？佢話自從政改方案公布之後，香港反對派提出嘅意見同立場大都超出特區政府話得事嘅範圍，香港啲高官根本冇權力、更冇牙力，煲呔曾帶領問責團隊搞幾多起錨騷、嗌幾多次「起錨」都作用唔大。
煲呔曾為免被邊緣化，搞場咁騎呢嘅辯論，都可以理解嘅。溫和民主派話：「佢哋喺幕前活動，點都吸引咗香港社會嘅眼球，等啲大人可以靜雞雞傾偈。」原來曾余辯好似細路仔醉心打機、吹水，佢哋沉醉一啲玩意，就唔使阻住大人做嘢。細路仔乖乖打機，唔好搞破壞就好嘞。