政情：媽打撲新人仔封利是
人民幣被憧憬升值，愈來愈搶手，就連前民政事務局常秘媽打李麗娟近日都加入搶購行列，仲指定要直版「人仔」。不過呢個舉動同投資無關，而係為快將喺內地舉行嘅生日會做好準備，媽打話，會請七百位小朋友共慶生辰，所以要封定七百封利是喎！
媽打呢個月三十日踏入人生第六十一個生辰，前日現身沙田馬場，講起生日臨近就興奮。忙碌嘅媽打今年會喺上海搞生日會，事關佢將以「龍傳基金」名義，夥拍青年團體遊上海睇世博，廿九日出發，同行有五百位香港青年。「上海姑爺」羅康瑞好體貼，借出地方畀媽打喺上海搞生日會，請埋五百位青年、一百位上海義工及一百位上海小朋友齊唱生日歌。
媽打重視意頭，生日會上會自掏腰包大派利是，近日四出搜羅直版人民幣鈔票，結果撲咗四間大銀行後至搵齊晒。