政情：田少質疑CY唔撐政改
全城球迷鬧哄哄談論世界盃，政壇內建制陣營就繼續埋首推「政改起錨」騷，我哋尋日喺和記大廈樓下撞見自由黨前主席田北俊，佢話無時間睇世盃，但時事就點忙都要留意，好似啱啱過咗嘅星期日睇亞視英文台節目《Newsline》，主持人問有份幫政府拍政改電視宣傳短片嘅行政會議成員夏佳理，點解政府唔搵行會召集人梁振英（CY），反而搵咗佢出鏡？田少驚嘆話：呢條問題真係問得好！
田少大惑不解，話三位行會成員夏佳理、胡紅玉同梁智鴻幫政府拍政改宣傳片，論資排輩，無理由少咗召集人CY嗰份㗎？到底係CY唔肯「落船」幫手起錨，定係有其他原因？CY之前喺最低工資同貧富懸殊呢類敏感問題，成日搶閘發表意見，點解今次「政改起錨」騷，全支政府船隊開行摩打，反而CY隻艇郁都唔郁，完全無起錨嘅？
田少話，可惜夏佳理星期日無正面回答問題，只笑笑口叫主持人問番CY喎。CY唔知會唔會做吓好心，幫田少解惑呢？