政情：李麗蕊阻扮嘢文起錨
政府近日四出硬銷政改方案，起錨、拋錨聲此起彼落，各不相讓，海洋公園主席盛智文見班高官連叫口號都唔齊，勢孤力弱，於是就玩埋一份，出口挺政府。不過為佢做翻譯嘅前唱片騎師李麗蕊（圓圖）唔知係反對起錨定係唔醒水，點都唔肯幫佢將Act now譯成起錨。
Act now變「迅速行動」
話說扮嘢文尋日出席海洋公園中華鱘館開幕禮後，帶記者遊覽呢個新景點，睇到幾條國寶中華鱘喺淡水游得咁舒服，就醒起要呼籲公眾保護水資源，佢話希望旅客參觀完中華鱘館後得到啟發，坐言起行，講到呢度最鬼馬嘅佢就舉手大叫「Act now!」，即係「起錨」嘅英文版本。
點知幫佢翻譯嘅李麗蕊只係將Act now譯做「迅速行動」，扮嘢文似乎唔多滿意，即刻講多兩次，示意李小姐要譯得準確啲，如果唔係唔放過佢，最後李小姐惟有講「好，我哋起錨去下一站！」扮嘢文先至肯收貨。