政情：政改決戰社團訪京收風

廣東社團總會每次換屆，新領導層都會禮節性到北京「朝聖」，本來算係半套例行公事，但係今次總會訪京，就掀起陣陣疑雲，同政改大戰扯上關係。首先，總會換屆唔係近期嘅事，而係早喺上年五月之事，當時總會已開始向北京「敲門」拜訪，但一直未等到檔期，直到上個月忽然收到通知，獲安排六月二十日一連三日北上，北京揀喺呢個時候發出請柬，唔會係特登等一年之後，送個訪京「大禮」畀總會新領導層賀牛一啩？

重量級人物齊北上

上月初，中央同特區政府拍板六月二十三日表決政改，以避過「七一」遊行效應，理論上「623」前夕，北京金睛火眼住香港政改形勢，千揀萬揀揀正喺呢個時候接待訪京團，如果純屬一般社團活動，咁就真係有啲反高潮囉。

廣東社團總會有理無理，以最高規格籌備呢次訪京團，由主席、身兼全國政協委員嘅王國強帶隊，人數超過一百人，當中不乏重量級人物，好似中聯辦主任彭清華以首席名譽顧問身份隨團，名譽團長有一班全國政協常委陳永棋、郭炳湘同戴德豐咁，見晒統戰部、港澳辦同僑聯，二十二日獲國家領導人接見，論規模同規格，係近年香港社團訪京中少見，難怪引起外界關注。

消息話，接見總會嘅有國家領導人，但當時正值香港政改表決前夕，中央會唔會因應香港政改形勢發展，有京官藉見總會，向香港放話呢？相信連總會都說不準，大家惟有引頸以待。