中環耳目：蔡加讚自創榴槤炸兩冧客
「玩具大王」旭日國際主席蔡志明一家人都係甜品迷，為咗滿足口腹之欲，蔡志明幾個月前斥資三百萬元，喺自家物業九龍城廣場開咗間甜品舖「甜之迷」，並交畀兒子加讚（Carson）同囡囡加怡（Crystal）打理。蔡家人人都有自己情迷嘅一款甜品，Carson仲按自己口味自創榴槤炸兩添！
海藻混蒟蒻外皮
Carson同卓妮講，爸爸一星期至少嚟食一次，必食嘅係榴槤腸粉，所謂腸粉其實係用海藻同埋蒟蒻做成嘅低卡路里外皮，入邊加埋鮮忌廉同香味獨特嘅榴槤，食落清新好味。Carson自創嘅榴槤炸兩就係用同樣嘅腸粉皮，入邊包住炸過嘅榴槤，伴碟就有心形朱古力同埋士多啤梨，啖啖滋味無窮。
Carson畀人感覺唔多說話，其實佢做旭日執行董事之後學識好多嘢，幫爸爸分擔唔少重任，傾起工作就好起勁，同平日判若兩人。難怪爸爸話會送架靚車畀佢，獎勵佢將九龍城廣場嘅人流推高兩倍以上，原來係無功不受祿。