中環出更：整爛千萬玉鈪三太揼心
做女人最幸福可能係有老公畀錢買首飾，但更幸福係當你整爛咗件首飾大嗌心痛嘅時候，老公會走埋嚟笑笑口安慰你︰「由佢啦！」呢位咁幸福嘅太太就係賭王三太陳婉珍。整爛咗嘅首飾，仲值成千萬元添。
賭王安慰唔肉赤
對古董有興趣嘅三太，對於講求眼緣嘅玉石特別喜愛，早幾日佢出席東華三院一個午宴，薄施脂粉嘅佢，腕上戴住三百幾萬蚊喺拍賣會買番嚟嘅翡翠玉鈪，非常搶眼。三太話呢隻玉鈪唔係佢最愛嘅珍藏，最愛嗰件佢唔會戴出街見人，因為件首飾已經爛咗。三太話嗰件首飾係何生喺拍賣會用成千萬投返嚟送畀佢，點知戴咗一次就畀佢整爛咗。三太心痛，不過賭王就一啲都無肉赤，仲反過來安慰三太，難怪三太甜絲絲猛咁話︰「我老公係幾好㗎！」真係好sweet呀！
三太謙稱自己對玉石嘅認識只係好皮毛，不過佢覺得玉石好講求眼緣，只要合眼緣佢就會買。三太仲話喺咁多款玉石翡翠之中，最鍾意白玉，清雅脫俗。