政情：蔡耀昌寸爆孔令瑜
民主黨近期對政改方案嘅態度表現得有啲軟化，將原本嘅三條底線降到得番一條。喺前日一個研討會上，民主黨就畀昔日盟友群起攻之，不過當日鬧得佢哋最甘嘅，竟然唔係一向激進嘅社民連，反而係天主教正義和平委員會幹事孔令瑜。孔令瑜鬧得興起，仲激到爆粗。呢番言論相信觸動到普選聯副召集人蔡耀昌嘅神經。
作為社民連主席陶君行太太嘅孔令瑜，同老公一樣熱衷社運。當日佢公然爆粗，究竟係忘記咗自己天主教徒嘅身份吖，定係用社民連主席夫人嘅身份講呢？蔡耀昌尋日呼籲市民星期日參與普選聯遊行時，就忍唔住寸爆孔令瑜，話無論係民主黨定普選聯，都唔會講粗口，仲重申普選聯唔會放棄爭取終極普選目標，叫大家唔好互相謾罵，曲解佢哋。
不過孔令瑜可能知衰，事關佢尋日再見記者時，已經唔係好想講番當日嘅事，仲話當日號召市民七一包圍普選聯，純粹係個人言論，唔關其他人事喎。