政情：應家柏波馬雙絕
世界盃熱潮一時無兩，足球總會同香港賽馬會尋日就食住個勢宣傳暑假舉行嘅青少年足球推廣計劃。馬會行政總裁應家柏都有出席，仲同大家講吓波經。應家柏身為德國人，當然有留意祖國喺世界盃嘅表現，德國隊尋日喺初戰大勝澳洲四比○，令佢喜出望外；但講到世界盃冠軍心水，應家柏除咗捧德國隊外，亦都好識做咁祝福港人熱捧嘅英格蘭有好表現。梗係啦，可以推高投注額嘛！
大家咪以為應家柏身為馬會行政總裁只識賽馬，原來佢後生嗰陣都係波牛，一九七○至七二年期間，佢係西德十六至十八歲足球青年軍成員，漢尼斯同路明尼加等一代名將仲算係佢後輩，認真威威。應家柏話，自己當年司職中場指揮大局，後來為咗升學先毅然放棄踢波，轉攻賽馬，終於修成「波馬雙絕」。
應家柏尋日見到一班足球小將，一時技癢同佢哋圍圈「搓波」，功架尚在。雖然佢無做職業足球員，但都寄語依家嘅小朋友好好享受足球，遠離毒品、酒精同吸煙等不良嗜好。