政情：陳家強黃潔夫處男開腔

唔少高官名人都天生一副好歌喉，財經事務及庫務局局長陳家強唱粵劇都唔失禮，但平日只限喺屋企自娛，為咗慈善，前晚為「健康快車音樂送光明」晚會粉墨登場，獻出寶貴第一次，連國家衞生部副部長黃潔夫都破例開金口。
陳家強苦練一曲《帝女花之香夭》，表現有板有眼。 （健康快車提供圖片）
陳家強苦練一曲《帝女花之香夭》，表現有板有眼。 （健康快車提供圖片）

推動中國復明行動嘅「健康快車」，前晚請嚟近廿位城中名人舉行一場慈善音樂會，健康快車創會主席方黃吉雯率先上台獻唱一曲《手連心》，體操王子李寧就與公子李小寧唱出《我和你You And Me》，馬會主席陳祖澤最拿手英文歌，唱番隻《I Just Called To Say I Love You》。

當晚壓軸好戲，係陳家強獻唱《帝女花之香夭》。化大戲妝幾花時間，陳家強着上中山裝上陣，成個熱血青年咁款。佢自爆唱粵曲係無師自通，表演前只同拍檔夾過兩次，所以心情十分緊張。當年救過「領呔大王」曾憲梓一命嘅黃潔夫都唔執輸，用普通話唱出《父親的草原母親的河》，聲線洪亮，全國人大常委范徐麗泰喺台下都拍爛手掌。

黃潔夫聲線嘹亮，令人聽出耳油。（健康快車提供圖片）
  • 黃潔夫聲線嘹亮，令人聽出耳油。（健康快車提供圖片）
方黃吉雯（左）、陳祖澤（左二）、李寧（前左三），手牽手來個大合唱。（徐家浩攝）
  • 方黃吉雯（左）、陳祖澤（左二）、李寧（前左三），手牽手來個大合唱。（徐家浩攝）