政情：自由黨傾全力新界西插旗

○八年飲恨九龍西嘅阿田，一二年將捲土重來，決定征戰新西，原因有兩個：第一，新西議席多，每名候選人只要攞到百分之八左右嘅得票率，就有機會得米，加上群雄逐鹿，兵慌馬亂，新人較易突圍。第二，自由黨一直有喺新西耕耘，莎姐敗走，肥水不流別人田，總得搵人繼承，阿田橫豎衝鋒陷陣，不如揀一個根基比較穩固嘅戰場，於是自由黨決定重新喺新西插旗，寄望阿田兩年後收復失地。

趁機打穩樁腳

自由黨高層消息指，阿田出名勤力，但個人之力始終有限，自由黨高層已拍板傾一黨之力為阿田抬轎，「租積金運動」就係頭炮。眾所周知，阿田反對重建居屋，唔會因基層票而隨便轉軚，但對打直選戰，尤其喺窮人較多嘅新界西，畢竟輸蝕，於是諗到以「租積金」計劃彌補呢方面短處，主打協助市民搵個安樂窩，擺明同班走基層路線嘅黨派對手鬥搶票。

「租積金」建議政府安排申請居屋合資格人士入住租金較平嘅公屋，但交居屋盤市值租金，差額由政府儲起，好似打工仔供強積金咁，到租客住滿五年，就可取回約廿萬元款額，屆時就有錢買下一個細細哋上車盤單位。「租積金」以自由黨名義提出，但真正推手係阿田。由尋日開始，阿田拍住黨主席劉健儀正式展開全港性宣傳活動，密密落新西拉票，提早為一二年立法會選舉打定樁腳。選戰打到嚟，但班泛民仲樂此不疲將精力放晒政改大戰，阿田諗起可能笑到瞓着都紮醒添啦！

有新西地區人士話，阿田搶灘新西，有迹可尋。好似農曆新年佢邊度都唔去，只去元朗同荃灣派揮春，又幫東涌居民爭取西鐵月票延期。到公民黨同社民連策動五區補選，佢更加向新西居民派十幾萬張宣傳單張，有意參選，就知阿田無寶不落。雖然最後中央決定冷處理補選，自由黨亦杯葛唔參選，但阿田喺新西已經開行馬達，補選落唔到場，忍到一二年肯定拉都拉唔住，大鬧新西！