中環出更（二）：啟山Prada波鞋新鮮落地
港協暨奧委會會長霍震霆（Timothy）一家人都係有品味之人。記得有次Tim霍着住條Prada褲，同立法會議員落區巡視工地，搞到條名牌褲污糟晒都唔介意。原來二仔啟山（Eric）都係Prada擁躉，早前卓妮喺「全民足動．樂活觀塘」活動上，見到Eric着住對Prada銀白波鞋，原來對波鞋啱啱喺香港有得賣，每對盛惠三千八百五十蚊。追求品味同時尚，兩仔爺一條心！
Eric係香港小型足球總會會長，亦都係足球嘅超級球迷。世界盃足球賽喺南非開鑼冇耐，Eric場場追睇，搞到把聲沙沙哋。佢話爸爸已飛去南非睇波，見證咗開幕禮。雖然當地治安欠佳，遊客被打劫時有所聞，但Eric話爸爸未驚過。莫非佢自請保鏢？非也！Eric話爸爸嘅自保之道四個字講晒：「低調行事！」
Eric熱捧英格蘭，雖然首場踢得麻麻，但佢一心一意撐佢哋，七月中仲會飛去南非睇半準決賽同決賽，最後二強之爭最想見到英格蘭同巴西對決。出席同一場合嘅哥哥啟剛話自己冇細佬咁瘋狂，只係揀賽事嚟睇，英格蘭係佢心水勁旅，但講到冠軍戰，佢最想睇巴西與西班牙對決！