政情：楊家駿領軍龍舟奪季
台灣駐港機構中華旅行社總經理楊家駿，去年首次帶隊參加端午節扒龍舟比賽三甲不入，但經過一年練兵後，尋日喺柴灣舉行嘅「2010年東區龍舟競渡大賽」揚眉吐氣，勇奪一般組銀盃賽第三名。楊家駿開心到好似中咗六合彩，揚言要喺後日嘅「赤柱國際龍舟錦標賽」再創佳績。
尋日共有六十二支隊伍參賽，楊家駿同中華航空公司香港分公司總經理孫鴻文坐喺船頭，帶領二十二位由華航同埋香港旅行社朋友組成嘅隊伍。當佢哋着住粉紅色隊衫出場時，幾乎靚絕全場，搶晒風頭，現場漁民不停幫佢哋加油打氣，全隊鬥志高昂。
楊家駿話，吸取去年參賽經驗，選手們經過一年時間培養默契同埋不斷練習，今次二十四位選手中有四位女士，以男女混合隊伍參與男子組比賽，結果獲此佳績好唔簡單。
楊家駿仲以扒龍舟寄語台港關係，話明年將帶領更多台灣駐港企業投入本地賽事，藉此加深台港互動交流。唔知對口嘅政制及內地事務局局長林瑞麟幾時會接受特訓，同楊家駿較量吓呢？