政情：曾余辯論 鬍鬚曾打定輸數
財政司司長曾俊華尋日更新網誌，主動提到今個月十七日嘅「曾余辯論」。鬍鬚曾喺網誌上面係咁長他人志氣，讚余若薇一向喺法庭雄辯滔滔，一時又話煲呔曾工作繁忙，難以專心準備辯論。唔只咁，鬍鬚曾仲話呢場辯論唔需要理邊個贏、邊個輸，最緊要係向市民解釋政改方案嘅理據。
疑似消防工會叫人起錨
擺到明，鬍鬚曾護主心切，喺網誌上面幫大佬搭條金樓梯落台，睇真啲咪又係「未打先輸」，真係唔寫好過。鬍鬚曾又講：「Donald，加油，為民主、為香港起錨」，真係骨都痹埋。
政府如火如荼谷政改起錨，一個消防人員經常瀏覽的非官方討論區，就有人留言，話有一個「香港××職工總會」最近向會員發電郵，叫人起錨，十六日參加支持政制向前走嘅維園活動。個會疑似香港消防處職工總會，但係香港消防處職工總會主席趙善聰斷然話「無！」佢話工會最近好忙，並聲言紀律部隊政治中立，同呢個××職工總會無關。