政情：青聯搬大屋旺丁又旺財
匯聚名人二代同城中才俊嘅香港青年聯會上周三喬遷之喜，進駐柴灣青年廣場二千五百呎新會址。青聯新竇夠晒旺財，裝修期間已獲多位歷屆主席及會員揼水，搞掂百萬裝修費。
青聯新居入伙，逾二百位名人齊到賀，除咗中聯辦主任彭清華，新舊青聯人馬，包括歷屆主席王敏剛、李宗德，仲有新世界主席鄭裕彤長孫鄭志剛、觀瀾湖太子爺朱鼎健，同埋香港青聯交流基金會主席胡曉明等，場面墟冚。
黃英豪曾智雄揼水
今屆香港青聯主席陳仲尼（Rock）介紹話，新會址面積比灣仔舊址大一倍；面積之大，喺香港青年團體會址中數一數二，標誌住青聯嘅發展踏進一個新紀元。阿Rock心中有連串大計，除咗繼續做政策研究，嚟緊仲會搞多啲活動，旨在與青年人加強溝通。
不過青聯新竇月租要三萬銀，開支唔細，好彩有唔少有心人「射住」，做過香港青聯主席嘅全國青聯副主席黃英豪及曾智雄好念舊，分別捐出三十五萬及三十萬；阿Rock都帶頭做好榜樣，出三十萬銀，認真唔話得。