政情：鬼祟起錨煲呔曾沾沾自喜

兩星期前「起錨」首航，特區政府團隊密封行程，同記者玩貓捉老鼠；上星期日拋錨後再「起錨」，出發前兩、三小時先至向傳媒發放活動路線，令記者疲於奔命，但係一樣遇上佢唔想見嘅示威者；尋日第三度「起錨」，佢索性玩陰招，特首辦前晚接受傳媒查詢，仍然諱莫如深，話無新搞作，結果中午過後，佢就喺facebook示威。

商販寸交行貨

煲呔曾帶埋老婆落區，由上午十一點至下午一點，去過中環鴨巴甸街、灣仔太原街同筲箕灣東大街派傳單，但政府新聞處下午五點至發放影片，瞞天過海六粒鐘。由政府新聞處攝製嘅影片所見，大部分出鏡嘅街坊都反應正面，但過程有冇經刪剪，又或者刪剪準則如何，就不得而知嘞。

其中一段係商販李先生緊緊捉住煲呔曾隻手，問起錨幾時有終點，到煲呔曾轉身離開，李先生仲大嗌：「我都會做好呢份工！」唔知係咪想寸煲呔曾無做好特首份工。事後，李先生同記者形容，煲呔曾好熱情，捉住佢隻手成三分鐘，但講到誠意，李先生話：「差唔多，都係標準答案。」咁精警同真誠嘅評語，可惜新聞處嘅製作片段欠奉，唔係就更有真實感。

同日，煲呔曾又喺facebook「起錨」群組撰文，話尋日朝早落咗幾場大驟雨，但諗起方案表決在即，都係決定冒雨落區，又話近日已開始籌備新一份施政報告，將會積極回應市民關注嘅民生議題，唔通明知政改勢遭否決，想用民生議題轉移孭鑊壓力？

煲呔曾落完區，特首辦主任譚志源交代，煲呔曾今次挑選嘅三個基層地區，都係煲呔曾童年時住過嘅地方，事前未有通知傳媒，係希望能低調探訪舊街坊喎，唔知心戰室有冇為呢場「勝仗」開香檳慶祝？係囉，如果特區政府對付泛民都有咁多橋，就唔使搞到方案瀕死嘅地步啦！