政情：李少光書法多得孫公

話說十多年前光哥仲係入境處處長嘅時候，一次赴內地做嘉賓，同內地高官一齊揮筆題字，點知人哋字字秀麗，光哥自覺手字好曳，返港就的起心肝周圍搵老師，咁啱孫公學緊，就將老師介紹咗畀佢，換句話說，光哥同孫公係同門，睇嚟今年年尾要搵兩位局長即席揮毫寫揮春，光哥寫「出入平安」，孫公寫「學業進步」就啱數啦。

光哥話寫字要靜，做入境處處長期間，趁食晏苦練兩小時，差啲畀人誤會佢閉門批示被拒入境名單，原來佢只係練字，其後調任做廉署一哥，仲曾經公開書法成果。可惜做咗局長後「靜唔到」，唔通做保安局個心好亂？光哥話唔係，係閒下來嘅時間都無，兩個鐘頭實在係好奢侈。

光哥太太蘇珊亦愛好中國書畫，前年曾開書畫展，同光哥天生一對，據知保安局副局長黎棟國同夫人都雙雙對對學書畫，師拜徐嘉煬老師名下，即係與光嫂同門。