政情：范太籲高官落區咪腳軟
特區政府前日落區宣傳政改造成大混亂，曾蔭權帶頭發老脾，擺明唔係有心聽市民意見，幾個團隊去到各區仲引來噓聲四起，全國人大常委范徐麗泰唔知係咪明知曾蔭權嘅跛腳鴨政府會腳軟，尋日出聲畀個膽佢，認為問責團隊應該繼續堅持與市民接觸、到社區宣傳，仲話如果問責團隊就此卻步，反對政府嘅人仲開心添。
范太尋日出席一個公開場合，被問及前日嗰場爛騷，佢雖然繼續撐住政府叫佢哋唔好腳軟，但亦話中有話，提醒班高官，其實市民最緊要係有機會同班高官接觸。咁講，前日嗰場大龍鳳就未必做得到嘞。
曾蔭權尋日下晝又喺facebook發表文章，為自己壯膽，話即使落區時面對大批不斷高呼「超錯」嘅示威者，佢仍然可以毫不畏懼地呼籲市民放下分歧，求同存異，又話執政者要學會放下身段，仲講到自己就算競選特首，都未試過落區嗌咪。自我陶醉係冇用嘅，佢真係要好好反省，講緊嘅唔係落區嘅方法，而係搞好個政府。