政情：沈祖堯拆彈息神像風波

沈祖堯話七月上任後會正式諮詢師生，佢態度開放咁話：「（個像）係咪放、放喺邊、放幾耐、係咪永久放、仲有人話想要有個廣場添，樣樣可以傾。」佢話發夢都夢見女神像，又話從藝術角度，女神像做得幾靚添。

對於中大以政治中立為由拒絕女神像入校，沈祖堯指「唔係最好嘅處理方法」，承認校方低估外界反應，佢指六月一日校方開會，雖然佢無出席，但知道會議內成員擔心唔少其他問題，例如保安、神像會否倒塌傷人、中大日後會否對政治人物塑像來者不拒等，反而對政治中立問題討論不多。

指大學應隔離政治爭拗

最後中大發表的答覆，只以政治中立為由拒絕申請，無提及保安理由，沈祖堯認為唔夠成熟，但都話佢係團隊一分子，有份承擔責任。佢話發表聲明前，曾經發電郵向校方表示措詞值得斟酌，建議轉用「未能夠達到共識」，但最終無被採納。佢話中大要從中學習，但重要嘅係大學應該跟政治爭拗保持距離，又話唔想做高調嘅校長喎！

大學校長經常畀人問對六四嘅立場，沈祖堯話當年正喺加拿大攻讀博士，感到痛心疾首，曾諗過返香港，又有流眼淚，傷心到連工都返唔到，要請一個星期假。至於平反六四問題，佢就只係重複兩句說話：「歷史會有公斷」跟「公道自在人心」。

中大學生會發表聲明讚沈祖堯勇於承擔，踩劉遵義唔肯同學生溝通，聲明又提到校方從未向學生會表達有關保安問題的立場，佢哋希望日後可以用公投決定「民主女神像」嘅去留。原定今日喺中大校園豎立嘅六四浮雕，因技術問題需要押後豎立儀式。