中環耳目：曾智雄愛留園雅敘撐枱腳
同太太撐枱腳，唔一定要食燭光晚餐。全國青聯副主席兼前人大常委曾憲梓二公子曾智雄（William）就揀位於灣仔嘅米芝蓮星級食肆留園雅敘，大歎上海菜。 William話，太太懷有身孕後口味大變，本來無辣不歡，依家卻辣啲都唔得，清清哋嘅上海菜，啱晒佢老婆大人胃口。
William係客家人，最欣賞梗係曾媽媽親手煮嘅客家菜。講到外出食飯，就首選上海菜。近期愛上留園雅敘嘅龍鬚桂魚絲，魚肉含豐富蛋白質，多食唔怕肥，點畀老婆食就最啱。
呢味餸幾考功夫，大廚用熟練刀法將桂魚起肉，切成幼絲再落鑊炒香，煮過嘅魚肉唔單止爽甜，入口仲非常滑溜。醉乳鴿係留園雅敘嘅招牌菜，每日限量發售十幾隻，手快有、手慢無，咁鮮嫩好味，William梗要試吓。
卓妮八到，留園雅敘嘅醉乳鴿係用新鮮嘅乳鴿加上等花雕酒炮製而成，凍食一流，再柯打一碟炒蜜豆，色澤翠綠晶瑩，豆香味濃，多食有益腸胃。
卓妮