中環出更：楊明標鍾情綠寶石勞力士

楊明標早前獲頒「世界傑出華人獎」殊榮，攞獎係喜事，標叔穿上筆挺西裝上台領獎，不經意露出腕上金光閃閃嘅名錶。

係乜錶呢？原來係勞力士。標叔話，隻錶買咗六、七年，特別之處係錶面數字以十二粒閃爍生輝嘅綠寶石代替，綠寶石係矜貴寶石，價值與日俱增，當年購入時不過廿幾萬，如今已升值至三十幾萬，戴錶仲有錢袋，真有眼光。

今年七十四歲嘅標叔，係錶界傳奇人物。一九五一年加入錶行做學徒，由掃地、打雜做起，今日已成為錶業龍頭，錶行版圖由香港伸延至深圳及內地多個城市。佢分享成功之道話，全靠穩打穩紮，從來唔炒樓炒股，有錢就買物業，等錶行唔使擔心租金，發展自然得心應手喇。

卓妮