中環出更：戴德豐邱達昌十指緊扣
小小香港，呢排議題多多，政改就最hit。尋日高官、行政會議成員同大商家十幾人齊集香港會食晏，傾啲乜不言而喻。香港會尋日好旺丁，一齊開餐嘅包括行政會議成員夏佳理、新世界發展董事總經理鄭家純、香港僑界社團聯會會長余國春、四洲集團主席戴德豐同遠東發展副主席邱達昌等，仲有負責政改嘅政務司司長唐英年。散席時，戴德豐同邱達昌肉緊起嚟仲傾到拖晒手。
尋日下午二時十五分午飯散席時間，但見香港會散出唔少名人，雖然傾足一餐飯，各人嫌未夠喉，邊行邊繼續傾。「零食大王」戴德豐拉住同樣係全國政協常委嘅純官雞啄唔斷，邱達昌加入話題，傾到興起時，戴德豐同邱達昌捉住對方隻手，即使行到會所大門口，依然握到實一實。
卓妮趨前問純官到底傾乜，佢輕描淡寫話：「冇嘢，大家食餐飯啫！」佢又自爆呢排好忙，愛駒「奪寶」前日出戰，都唔得閒捧場喎。
香港會內仲有兩枱貴客，工聯會鄭耀棠約埋立法會議員黃國健（KK）、葉偉明等人，同政制及內地事務局局長林瑞麟食晏。步出大門時，三人各有各散，十足「走佬三人組」。葉偉明否認傾秘密嘢，話只係例行飯局。
KK講「派錢」拖人落水
講起有福建派社團向參加遊行人士派錢，KK幫理不幫親話：「呢啲嘢要迅速糾正，就算畀少少車馬費都唔得！」不過佢下晝又喺立法會試圖幫政制向前走大聯盟嘅召集人鄭耀棠解畫，話本港左中右嘅政團周不時都有呢啲做法，一啲都唔出奇，仲話對於網民狙擊未驚過喎，佢又點名話職工盟早前都同街坊一齊飲完茶先去五一大遊行添。
同樣喺香港會食飯嘅仲有發展局局長林鄭月娥，佢同同事開餐，似乎少少嘅政治味道都冇沾上。
卓妮