政情：李國棟回味墨國螺片
馬會大董李國棟醫生早前話畀我哋聽要去墨西哥度假聖地坎昆開會，原本以為當地冇啖好食，所以帶備乾糧醫肚，仲預咗會瘦幾磅返嚟添！轉眼佢已經開完會返港，尋日喺馬場現身，佢話對當地完全改觀，大把美食，尤其是響螺沙律好味又抵食，成個西瓜咁大碟都只係賣七蚊美金，至今諗起都回味無窮。
李醫生話，佢喺坎昆幫襯一間日式餐廳，對當地響螺印象深刻。間餐廳將響螺切厚片，唔似香港咁薄到風都吹得起，估唔到厚切響螺肉稔且味道鮮美，佢最喜歡用蒜蓉炒過響螺之後再撈沙律食，入邊至少有廿幾塊響螺，成碟有一個西瓜咁大，盛惠七美元，難怪李醫生大讚超值抵食！
除了響螺之外，墨國嘅辣椒同埋墨西哥豆都好好味，但李醫生唔敢食太多，佢笑謂豆類會產生「氣體」（即放屁），始終要喺室內開會，所以為人為己，惟有淺嘗即止。
美食當前，李醫生帶去嘅乾糧基本上冇郁過，咁有冇瘦到呢？李醫生指住自己條腰話：「你話呢？」