政情：顧明均百五萬投紅酒
著名廠商南太電子創辦人顧明均日前以一百五十多萬元投得一支極罕有嘅Screaming Eagle，揚威紅酒拍賣會。唔講唔知，顧明均係全世界Screaming Eagle最大收藏家之一，呢次競投成功，珍藏名單又添一項紀錄。
顧明均喺美國時間本月五日，於美國加州著名釀酒區Napa Valley新一屆佳釀拍賣宴會上，以二十萬美元（約一百五十六萬港元），投得一支六公升Screaming Eagle紅酒。呢個酒莊嘅佳釀，以產量矜貴，價格高昂以及酒評分數極高聞名於世。
顧明均非常喜歡Napa Valley呢個地方，每年都會去美國參加慈善紅酒拍賣會，更連續多年成為此活動出價最高嘅競投者，多年來已花費超過三百萬美元競投心頭好，因此MK Koo（顧之英文名縮寫）呢個名，喺Napa Valley無人不曉。投到名酒後，顧明均會將戰利品運返去加拿大嘅屋企一個容納到二千支酒嘅大型酒窖珍藏。