政情：哪吒自把自為撐起錨
起錨騷二部曲尋日上映，煲呔曾同佢班官員兵分三路去港、九新界宣傳，早預咗會畀社民連同抗議嘅巿民夾道偷襲，但怕且無諗過會畀人搶咪。
今次場騷，事前並無講過會有議員或者政黨落場幫拖，點知當財爺曾俊華同財經事務及庫務局副局長梁鳳儀落到坑口站，居然會有人比佢哋更早到場「起錨」，呢個咁好中氣嘅人就係自由黨西貢區議員方國珊（哪吒）。佔盡地利嘅佢揸住支無線咪叫口號，搞到企喺佢後面嘅梁鳳儀勁無奈，至於上次喺首部曲被人窒到口啞啞嘅鬍鬚曾唔使問就更無奈啦。
田少劉健儀唔知情
不過原來自由黨前主席田北俊完全唔知愛徒今次嘅出位行徑，田少拿拿臨打畀現任主席劉健儀問佢到底係賣緊咩嘢藥，劉健儀就話個黨冇傾過要落區撐政改，哪吒咁落力，但就鹵莽咗啲，黨高層似乎唔係咁欣賞。
同喺將軍澳區，保安局局長李少光去到東港城宣傳嘅時候，遇正有小施丹之稱嘅馬丹出席商場三人足球賽，局長雖然無得交換球衣，不過派政改襟章一樣受歡迎，仲有得同班小球員合照添。宣傳政改原來都有和諧嘅時候。