政情：李運強替孖孫改名要「響」朵
理文造紙太子爺李文斌（Edmond）嘅一對孖生仔女啱啱出世三日，正等緊阿爺、理文造紙主席李運強改名。尋日我哋喺馬場見到李運強，佢話呢對孫仔孫女按族譜係「濟」字輩。佢好有心得咁話，改名要計筆畫、五行，最緊要讀起上來夠響。我哋問佢會唔會搵堪輿師傅幫手，佢都話唔排除呢個可能。
李運強笑謂佢改名經驗豐富，皆因大仔李文俊已有三個小朋友。講到對呢對孖孫嘅期望，李運強同天下仁慈嘅阿爺一樣，只希望佢哋快高長大、健康快樂、聽教聽話啦！有孫萬事足，李運強愛駒「包裝之友」尋日跑包尾，佢都一笑置之，話有輸有贏好平常啫！
董太為善事跑馬
啱啱講完仁濟副主席Edmond嘅喜事，咁啱轉頭就見到仁濟主席董吳玲玲，佢同平時好少曝光嘅老公董中浩拍拖入馬場。董太話佢嚟捧兩隻馬場，一隻係叔仔董又浩嘅新馬「帝皇之星」，另一隻係董太有份做馬主嘅團體馬「希望之星」，原來董太係香港福建希望工程基金會榮譽主席，佢希望隻馬跑出賺獎金做善事，可惜今次落空，惟有期望下次啦。