中環出更：劉秀成打達文西呔悼偶像
歐洲文藝復興時代嘅天才達文西當然唔止密碼咁簡單，佢喺建築、工程、幾何、解剖、雕刻、發明，以至音樂、繪畫都無一不精。打埋算盤都叫做係行家嘅立法會建築、測量及都市規劃界代表劉秀成，早幾日佢唔知係咪發思古之幽情，打咗一條以達文西手稿為圖案嘅領呔去立法會。佢仲大讚達文西呢位偉人，唔止係自己偶像，而係眾人偶像。
怕危險已掛靴
呢條名為Brochier Soieries嘅領呔品牌，有一個藝術家系列，劉秀成打緊嘅呢條米色真絲領呔就係屬於呢個系列，除咗米色，仲有灰色、海藍色同紅色。劉議員早幾日啱啱生日，佢話條呔唔係生日禮物，嗰日只係同家人食飯慶祝，當然仲有乖孫相伴啦。
上星期立法會有波踢，以前守開龍門嘅劉秀成話已經退咗休，無再踢波。○八年劉秀成做門將代表立法會出戰外國駐港總領事隊，飛身救波時撲倒在地，搞到一度昏迷兼短暫失憶。劉議員話嗰次其實係佢嘅告別賽，為免危險，依家佢都無再踢波。
卓妮