中環出更：紅姑繼續扮靚獨愛MARNI
年齡係女人最大勁敵，但皺紋特別優待「性感尤物」鍾楚紅。紅姑息影多年，唔使再花枝招展示人，但靚樣始終係生招牌，五十歲都要繼續執靚自己。近日紅姑愛上走甜美路線嘅意大利名牌MARNI添。
紅姑講明無意復出，但近月頻頻亮相時尚活動，狀態大勇。話晒要見人，梗要置多幾套新衫。卓妮早前喺中環置地廣場撞見紅姑行街買衫，嗰陣係黃昏六點幾，梳起小髻、戴上黑超嘅紅姑飛快行入MARNI，行咗一圈後鎖定五、六套春夏新裝。店員見大客光臨，當然任得佢試喇。
問店員配搭意見
紅姑戴住黑超試衫，視線多少受阻，所以每着上一套新衫，就行去店舖中間嘅大鏡前，逐件睇真啲。試咗一輪後，紅姑似乎睇中一件灰色荷葉領外套，仲細心問店員，點樣配搭最好睇，店員樂於畀意見，更為紅姑整理衣領。咁好嘅招呼，顧客自然冧晒。
揀揀吓，店員發現有記者喺門外守候，拿拿臨叫紅姑走入試身室暫避。紅姑見慣世面，唔理咁多繼續睇衫，再試咗十五分鐘後，當卓妮以為紅姑滿載而歸，點知佢步出MARNI時，卻未見有收穫。
卓妮上前打招呼，問佢點解揀唔啱，紅姑報以甜笑話：「係呀，睇唔啱！」然後步上置地四樓一間餐廳食晚飯，生活睇嚟十分寫意。
講番意大利品牌MARNI，近年火速走紅，風格甜美，以豐富色調、多變嘅圖案印花，俘虜全球女性的心。MARNI設計漂亮、女性化，感覺年輕又別具貴氣，深受年輕時尚女士歡迎，除咗紅姑外，金利來太子爺曾智明嘅歌星太太黎瑞恩，都係MARNI擁躉。
卓妮