日相鳩山由紀夫終因未能兌現選舉期間的諾言——把美軍基地搬遷到國外而下台。作為香港問責高官的周一鑊，用盡方法迫使雞販「自願」交出牌照，最大的誘因就係政府會實行活家禽中央屠宰。兩年前，周一鑊見記者時仍言之鑿鑿：中央屠宰或集中屠宰已經是不可以爭議的事實，是一定要推行的。如今，政府出爾反爾，稱決定擱置有關計劃，如此言而無信，試問已交回牌照的雞販，怎能不怒斥被政府「賣豬仔」？周一鑊失信於雞販，如果他知恥的話，理應學鳩山鞠躬下台。
自一九九七年爆發禽流感至今，政府空談中央屠宰十多年，期間活雞供應數量由每日六萬隻急降至一萬四千隻，僅佔市場供應量百分之六，另外三成係冰鮮雞、六成幾係雪藏雞。盲嘅都知政府用種種行政手段扼殺活雞供應量，例如唔准活雞留過夜，令活雞市場迅速萎縮。換言之，活雞供應少，要食就要捱貴雞，市民迫於無奈要吃冰鮮雞。好喇！之後周一鑊廢噏：港人已習慣吃冰鮮雞，故無理據支持「加雞」。看官，呢啲就叫強詞奪理喇！如果政府一早落實中央屠宰，活雞供應就唔會大減，我哋就唔使被迫食冰鮮雞。佢夠膽死掉番轉嚟講，真係當市民弱智！
有個統計數字的笑話：在美國亞利桑那州死於肺結核的人比其他州的人多，這是否就意味這個州的氣候容易生肺病？恰好相反，亞利桑那州的氣候對肺病患者有好處，所以肺病患者紛紛前來，自然就使這個州死於肺結核的平均數升高了。周一鑊說港人已習慣吃冰鮮雞，生安白造無過此者。民無信不立，周一鑊，下台吧！