政情：發叔做團長再遊世博
十八區區議會日前全數通過支持政改方案後，政府隨即安排十八區區議會正、副主席今日到上海考察四日，參觀世博之餘仲不計成本兼遊蘇州，個團機票酒店由政府付鈔，三餐就由團友自己搞掂，睇嚟都係由家底夠厚嘅團友輪流做東。
民政事務局局長曾德成話，區議會係政府推動地方行政嘅重要夥伴，親身考察有助日後推動地方行政工作，但點解其他區議員又無份呢？睇怕用意都係答謝班主席落力推銷政改居多。
今次考察團團長係屯門區議會主席劉皇發，而東區區議會主席丁毓珠就做副團長，中聯辦副主任周俊明係榮譽顧問，連民政事務總署署長陳甘美華都有個名譽副團長銜頭，反而立法會區議會功能界別代表只係做名譽顧問。全團五十幾人，其中中聯辦港九新界嘅工作部都有代表。
發叔今次係第二次去世博，首次在五月初跟立會世博考察團，算係熟晒架步，唔怪得今次做團長帶隊啦！