政情：馮偉華氹仔女贏獎金
最近YouTube出現一條終極普選聯盟召集人馮偉華喺○二年參加電視台有獎遊戲節目嘅片段，馮偉華尋日同我哋講，佢當年攞咗十四萬銀獎金，去玩遊戲純粹係為咗氹對仔女開心，事後仲發現自己策略太保守添！
馮偉華自爆當年成日陪一對仔女睇亞視嘅《百萬富翁》，最後為咗氹對仔女開心，自己走去報名參加，不過到抽到佢玩嘅時候，節目已經做完，所以佢就去參加接住推出嘅《各出其謀》。
我哋睇番條片，發現馮偉華喺常識題答得比較差，好似「豫」係中國邊個省嘅簡稱、長者八達通卡係乜顏色、比利時首都喺邊等問題，馮偉華都唔識答要棄權。
最後馮偉華答啱十幾條問題，拎走十四萬，呢筆錢話多唔多，馮偉華話捐咗部分錢去慈善機構，又幫老婆交埋稅，最後同屋企人去旅行慶祝嘅錢都要自己倒貼喎！不過事後佢諗番就發覺玩得太保守，因為佢當時已經有十萬蚊袋袋平安，可以再博啲袋多幾萬。佢保守嘅心態，唔知係咪可以反映佢喺政改嘅談判桌上呢？