政情：田少宣傳港旅業顯江湖地位
旅遊發展局借上海世博宣傳香港旅遊業，主席田北俊日前親自帶隊北上督師，率領十多間香港最高檔次酒店嘅總經理級高層（ＧＭ）同行，到當地商議內地團住房優惠。十幾間大酒店ＧＭ浩蕩北上，算係旅業界奇景，仲要食、住、機票全部自費都肯制，盡顯田少嘅江湖地位。
旅發局喺過去嘅星期一晚喺上海新天地啟動「這一刻上海，下一刻香港」宣傳攻勢，田少北上主禮，唔止剪吓綵、做吓背景板咁簡單，仲有實際任務在身。前日返港嘅田少話，旅發局喺今年盛夏舉辦多項盛事，好似「國際龍舟嘉年華」同「夏日流行音樂節」咁，如果冧掂香港嘅高檔酒店為上海團提供訂房優惠，對吸引數以千萬計嘅世博遊客順道來港玩番幾日，好有幫助，於是就促成呢趟ＧＭ世紀團嘞。
據聞班ＧＭ實地考察完世博人潮之後，對上海團信心大增，同旅行社高層傾折頭時都特別「疏爽」啲。而班ＧＭ有田少做領隊，遊世博展館時自然唔使點排隊，「視察」行程相當順暢。