政情：陳南祿拉頭馬賀跳槽
將於七月過檔擔任恒隆集團董事總經理嘅太古（中國）主席陳南祿（Philip），現正享受離任前休假，得閒以馬會大董身份入場睇吓賽馬，月尾又陪太太同囡囡去上海睇世博，不知幾爽。Philip前晚又同太太入馬場為愛駒「時時有機」打氣，雖然夜晚落大雨，但愛駒都無怨個天唔鍾意佢，留前鬥後，最後一百米發力衝過終點，為Philip贏得廿七萬元獎金。
「時時有機」搏到盡
Philip獲愛駒送贈一筆突如其來嘅過檔賀禮，令本身招牌笑容更加燦爛，興奮得拉埋正在馬會食飯嘅國泰企業事務董事莊偉茵落場拉頭馬，唔怪得Philip嘅人緣咁好喇。Philip話，好開心愛駒跑出，仲話愛駒每次出賽都係搏到盡，爭取好成績，莫非Philip將自己嘅拚搏精神傳授咗畀愛駒？至於點樣慶祝，佢就話要問過太太喎！
「時時有機」自○八年三月首次出賽爆大冷勝出後，近兩年成績一直浮浮沉沉，直至前晚收復失地，莫非想祝賀主人過檔外，仲暗示Philip過檔恒隆集團後將會大發神威？