政情：煲呔曾起錨玩捉迷藏

煲呔曾「起錨」第二波玩洗樓，據聞，佢早喺今個星期初，曾經靜雞雞部署過一次洗樓行動，但最終取消行程，原因未明，一拖就拖到星期日。官場中人否認曾有洗樓行動「拋錨」事故，稱計劃尚未啟動喎，咁煲呔曾都未能付諸行動，話未開始過都有得拗嘅。總之佢哋誓言，煲呔曾後日嘅新一輪政改宣傳攻勢，會安排傳媒採訪，「唔會再衰喺記者手上」，咁唔知算唔算間接承認上周六嘅「起錨」行動衰咗呢？

唔再閃縮 必有古怪

煲呔曾閃縮落區，目的要避開民主派狙擊，後日佢突然「Open」，一定有古怪。所謂江山易改，品性難移，以煲呔曾嘅性格，邊有咁大方？唔通佢玩綁架？通知記者喺某個地點集合，然後一批過接載前往目的地訪攝，事前就可滴水不漏，「密封」行程，到泛民嘅「線人」記者知道具體地點，再通風報信，煲呔曾可能已轉移陣地，全日同泛民玩捉迷藏。

唉，身為官員，落區見市民係一定要做嘅功課，係行民主路嘅必經之路，如果光明正大，又使乜搞到好似做賊咁可悲吖？特區政府乜都唔使做，日日為點樣同記者及民主派狙擊手捉迷藏絞盡腦汁，公帑就係咁，倒晒入鹹水海。

煲呔曾自把自為向余若薇下戰書，單挑辯論政改造勢，搞到民主黨同建制派牙癢癢，匯賢智庫主席葉劉淑儀早前去信煲呔曾，要求加入辯論，特首辦尋日回覆，話無意圖再同其他人辯論，畀檸檬葉太食。葉太尋日講起即滿肚怨言，話要求加入辯論，都係想幫輕吓煲呔曾，萬一煲呔曾講錯嘢，都有佢現場幫手補飛，但煲呔曾以小人之心度君子之腹，以為佢做攝石人，認真無奈。